Айаал, кытаат, өрөйөн-чөрөйөн биэр, Олоҥхо дойдута барыта эйиэхэ эрэнэр!

Киһи аймах күүһүн-күдэҕин, сымсатын, тулуурун, түргэнин көрдөрөр, быһаарар улуукан аан дойдутааҕы түһүлгэҕэ саха боотура кыттара, дойдутун ааттатара киэн туттууну үөскэппэт буолуон сатаммат. Японияҕа ыытылла турар сайыҥҥы Олимпийскай оонньууга биһиги биир дойдулаахпыт, билиҥҥи кэмҥэ тумус туттар боотурбут Айаал Лазарев атын омуктары кытта тэҥҥэ күөн көрсө, илин былдьаһа сылдьара даҕаны үөрүүлээх.

Айаалбыт бу улуу түһүлгэҕэ туох баарынан ситиһиилээхтик, кыахтаахтык кыттарыгар бары баҕарабыт. Этэргэ дылы, кини сүтэрэрэ суох, күүстээх санаатын киллэрэн, туохтан даҕаны самныбакка, толлубакка, кэннинэн кэхтибэккэ хорсуннук туруулаһарыгар, кыайыы туһугар дьулуһарыгар, бэйэтин көрдөрүөн баҕарабыт.

Тустуу мунутуур бөдөҥнөрүн, күүстээхтэрин ыйааһыннарыгар биһиги Айаалбыт бастаан американец Гейбл Стивесону кытта тустар. Онуоха бары биир киһи курдук бөҕөспүтүгэр ыалдьыаххайыҥ, киниэхэ ситиһиини баҕарыаххайыҥ. Үтүө баҕа санааларбытын этэн, уолбут күүһүгэр — күүс, кыаҕар — кыах, сэниэтигэр- сэниэ эбиэҕиҥ. Итиэннэ түмүк хайдах даҕаны буолбутун иһин, баар-суох бөҕөспүтүн харыстыаххайыҥ, хараанныаххайыҥ!

Инстаграмҥа страницабар Айаал Лазарев тустар ыйааһынын сэрэбиэйин түмүгүн таһаарбыппар, спорду таптааччылар бэйэлэрин баҕа санааларын суруйбуттарыттан талан билиһиннэрэрбин көҥүллээн:

Nakhodkinruslan: Уолбут этэҥҥэ кииристин, туһуннун. Төрөөбүт дойдута, ийэ сирин буора күүс-көмө буоллун, бөҕө тирэх буоллун!

Айаал, кытаат, өрөйөн-чөрөйөн биэр, туохтан да толлума, саллыма, кыайыыга күүстээх дьулуургун барытын киллэр. Олоҥхо дойдута барыта эн диэки эрэллээхтик көрөр, Саха сирин аар-сааргы аатырдан, кыайан-хотон дойдугар, алаһа дьиэҕэр эргиллэн кэлээр. Ситиһиини, кыайыыны-хотууну, кытаат, Олоҥхо дойдутун мохсоҕоло, кыайыыга кынаттанан, үрдүк чыпчаалга тахсар гына дьулус, барыта этэҥҥэ буолуо, дойдун эйиэхэ күүскэ эрэнэр.

Khistoforovpanteleimon: Айаал хайаан да кыайыа. Эрэнэбин. Мин эппитим буоллун. Домм.

Sergeibryzgalov6000: Айаал этиллибитин курдук, туох бааргынан кытаат, биһиги ыалдьар хаһыыбыт Японияҕа иһиллиэ, эрэл баар барытыгар. Дом!

Erkin2020mai: Саалаахтан самныма, охтоохтон охтума!

Alekseev_ali: Дьэ, Саха тустуутун сирэйэ буолбут Уолбутугар кыайарыгар баҕарыаҕыҥ, норуот барыта туоларыгар Үрдүк Таҥараҕа көрдөһүөҕүҥ. Кини эрэ билэн турдаҕа.

Оттон бу, көҥүл тустууга ССРС спордун маастара Дмитрий Винокуров – Чаҕаан, Айаалга анаан айбыт хоһооно:

Азияҕа бастакылаах

Аар саарга үһүстээх

Айаалбытын алгыстыаҕыҥ,

Аал уоппутун аһатыаҕыҥ.

Байанайбыт уолбутугар

Бэрис эрэ бааккыттан,

Түһүлгэтэ тэбэн кулу

Модуҥ саха боотуругар.

Айыы аймах үөрүө этэ

Айаал кыайан көрдөрдөр,

Үс ньүккэн түгэҕигэр

Чыпчаал үрдүк оройугар.

Иэйэхситэ эҥэрдэстиҥ,

Айыыһыта арыаллаатыҥ

Айыы Аймах боотурун,

Саха модун тустуугун.

Айаал, бэйэҥ дьэ кытаат,

Түһүлгэҕин ыһыктыма

Алҕаатахпыт буолуохтун,

Аал уокка айах тутан.

«Дьулурҕан».

Добавить комментарий

Ваш адрес email не будет опубликован. Обязательные поля помечены *