Азия чемпионата: Егор Дмитриев – Сакаки, Айаал Лазарев — Зубаиди

Дьэ, сарсыҥҥыттан, олунньу 22 күнүттэн Индия киин куората Делигэ, Азия көҥүл тустууга чемпионата саҕаланар. Бүгүн, ыйааһыннарга барыларыгар сэрэбиэй оҥоһулунна. Эрдэ иһитиннэрбиппит курдук, саха тустууга кыһатын икки иитиллээччитэ кыттар: Азия чемпионатын экс-чемпиона Айаал Лазарев (Кыргызстан) уонна Д.П. Коркин турнирдарын призердара Егор Дмитриев (Филиппины).

Кэлин биллибитинэн, Е.Дмитриев 57 кг буолбакка, 61 киилэҕэ тустар буолла. Ол курдук, 61 киилэҕэ барыта 14 бөҕөс баар. Сэрэбиэй быһыытынан, Егор Дмитриев (тренерэ Александр Софронов) үөһээ бөлөххө финал чиэппэригэр дьоппуон Риуто Сакакины кытта тустар. Сакаки — Император кубогын кыайыылааҕа, аан дойду эдэрдэргэ күрэхтэһиитин призера.

Өссө бу бөлөххө М.Икромов (Таджикистан), Юн Джи Хун (Корея) уонна А.Алибегов (Бахрейн) бааллар.

Оттон аллараа бөлөххө индус Р.Аваре, узбек Д.Туробов, кыргыз У.Жолдошбеков, казах Н.Абдуалиев, иранец М.Дастан курдук биллэр-көстөр бөҕөстөр бааллар.

Манна олохтоохтор эрэллэрэ, дойду чемпионатын-2019 боруонса призера Рахул Аварены чорботуохха сөп. Биһиги Егор Дмитриевпит даҕаны мэтээл иһин киирсэр кыахтаах. Онон эрэлбитин сүтэрбэппит.

Саамай ыарахан ыйааһыҥҥа уон икки кыттааччы баар. Биһиги Айаал Лазаревпыт (тренерэ – РФ, СР үтүөлээх тренерэ Иван Сивцев) аллараа бөлөххө киирбит. Кини маҥнай Зубаидины (Ирак) кытта киирсэр буолбут. Бу бөлөххө кинилэри тэҥэ өссө узбек С.Мухарамов, иранец П.Хади, казах Ю.Батырмурзаев, индус Сатендар бааллар.

Туох даҕаны диэбит иһин, биһиги уолаттарбытыгар “ыалдьабыт”. Кинилэр ситиһиилээхтик кытталларыгар эрэнэбит.

61 кг. Финал чиэппэрэ

Риуто Сакаки (Япония) – Егор Дмитриев (Филиппины)

Мухаммад Кромов (Таджикистан) –

Квалификация

Юн Джи Хун (Корея) – Алибег Алибегов (Бахрейн)

— —————————————————————

Рахул Аваре (Индия) – Мухаммад Билал (Пакистан)

Рами Алама (Саудовскай Аравия) – Джахонгирмирза Туробов (Узбекистан)

Улугбек Жолдошбеков (Кыргызстан) – Нурболат Авдуалиев (Казахстан)

Ганбаяр Намсрай (Монголия) – Маджид Дастан (Иран).

125 кг. Финал чиэппэрэ

Заман Анвар (Пакистан) – Дожханд Худербулга (Монголия)

Нам Куонг Джин (Корея) – Тецуя Танака (Япония)

— —————————————————————-

Квалификация

Омар Сарем (Сирия) — Парвиз Хади (Иран)

Айаал Лазарев (Кыргызстан) – Тахар Аль-Зубаиди (Ирак)

С.Мухарамов (Узбекистан) — Сатендер (Индия)

Юсуп Батырмурзаев (Казахстан) – Фархад Анакулов (Таджикистан).

Санатан эттэххэ, Азия чемпионатыгар Россияттан төрүттээх уон икки бөҕөс кыттар: 57 кг — Нурислам Санаев (Казахстан), 61 кг — Егор Дмитриев (Филиппины), Алибег Алибегов (Бахрейн), 65 кг — Гаджимагомед Алиев (Бахрейн), 70 кг — Ильяс Бекбулатов (Узбекистан), 79 кг — Арсалан Будажапов (Кыргызстан), 86 кг — Алигаджи Гамидгаджиев (Кыргызстан), Иса Шапиев (Узбекистан), 97 кг — Магомед Мусаев (Кыргызстан), 92 кг — Илисхан Чилаев (Казахстан), 125 кг — Юсуп Батырмурзаев (Казахстан), Айаал Лазарев (Кыргызстан).

Петр ПАВЛОВ.     

 

Добавить комментарий

Ваш адрес email не будет опубликован. Обязательные поля помечены *