Аан дойду Кубогын кыайыылаахтарыгар – Дьокуускайга кыбартыыра!

Н.Н. Тарскай кэриэһигэр көҥүл тустууга Саха сирин биирдиилээн уонна хамаанданан чөмпүйэнээтин үөрүүлээхтик аһыы кэмигэр, соторутааҕыта “Триумф” Спорка бэлэмнэнии киинигэр ыытыллан түмүктэммит аан дойду Кубогын кыайыылаахтара Арыйаан Тютрины уонна Виктор Рассадины чиэстээһин тэрилиннэ.

Саха Өрөспүүбүлүкэтин физическэй култуураҕа уонна спорка миниистирин солбуйааччы Александр Бугаев тустуу ыйа салҕанан ыытылла турарын, өссө нэдиэлэни кыайбат кэм анараа өттүгэр аан дойду Кубога ньиргийэн үрдүк таһымнаахтык ыытыллан ааспытын, кыайыылаах Арассыыйа хамаандатыгар биир дойдулаахтарбыт ситиһиилээхтик кыттыбыттарын санатта. Кырдьык даҕаны, ол түһүлгэ дуораана ситэ түмүктэнэ илигинэ аны Саха сирин көҥүл тустууга чөмпүйэнээтин көбүөрэ тэлгэнэн, сытыы хапсыһыылар саҕаланнылар. Быйылгы чөмпүйэнээт, саха спордун аҕатынан билиниллибит Николай Николаевич Тарскай төрөөбүтэ 95 сылыгар ананан ыытыллар. Ол курдук, ыам ыйыгар өрөспүүбүлүкэбит киинигэр уонна төрөөбүт дойдутугар – Уус Алдаҥҥа үбүлүөйдээх тэрээһиннэр ыытыллаллара былааннанар. Оттон быйылгы сыл өрөспүүбүлүкэ саамай улахан күрэхтэһиитинэн – аны сайын Аммаҕа буолар Саха сирин норуоттарын VII спортивнай оонньуута буолуоҕа.

Чөмпүйэнээти үөрүүлээхтик аһыыга Василий Уйгуровка – Арассыыйатааҕы таһымнаах судьуйа буоларын туоһулуу анал бэлиэ уонна дастабырыанньа, оттон бөҕөстөр: Максим Толмачевка, Антон Корякиҥҥа, Степан Скрябиҥҥа, Айхаан Антоновка, Дьулустан Сивцевкэ уонна Игорь Аммосовка – Арассыыйа спордун маастара ааттар иҥэрилиннилэр.

Дьэ, ол кэнниттэн аан дойду Кубогын кыайыылаахтара Арыйаан Тютрины уонна Виктор Рассадины чиэстээһин саҕаланна. Кинилэргэ “Строй Академия” тутуу хампаанньатын (дириэктэр Руслан Джабраилович Алибеков) аатыттан Дьокуускай куоракка биирдии хостоох кыбартыыра ылалларыгар сертификат тутарылынна. Ону тэҥэ Уус Алдан улууһун баһылыга А.В. Федотов Арыйаан Тютриҥҥа массыына ылынарыгар диэн 700 тыһыынча солкуобайдаах сертификат, Виктор Рассадиҥҥа убаһа атыылаһарыгар көмө харчы, кинилэр тириэньэрдэрэ Иван Иванович Дмитриевкэ 100 тыһыынча солкуобайдаах сертификат, оттон А.Тютрин бастакы тириэньэрэ Семен Гаврильевич Петуховка 20 тыһыынчалаах сертификат туттарда. Ити үп-харчы барыта Уус Алдан улууһун олохтоохторунан хомулунна. Спонсордарынан улуустан төрүттээх салайааччылар уонна предпринимателлэр: А.В. Федотов, Р.Д. Алибеков, А.И. Алибекова, C.В. Винокуров, П.И. Бурнашев, П.С. Алексеев, М.М. Алексеев, И.И. Данилов, А.И. Заболоцкай, И.И. Слепцов буоллулар.

Ити курдук, өрөспүүбүлүкэ киин куоратыгар олорор Орто Халыматтан төрүттээх биир дойдулаахтара Виктор Рассадиҥҥа биир хостоох кыбартыыра ыларыгар күүс-көмө буолалларын туһунан бэрэстэбиитэл А.И. Самсонова иһитиннэрдэ.

Маннык үрдүк сыанабылы ылан баран, тустууктарбыт Арыйаан Тютрин, Виктор Рассадин уонна Эдуард Григорьев аҕыйах хонугунан Сочига ыытыллар Арассыыйа сүүмэрдэммит хамаандатын үөрэтэр-эрчийэр түмсүүтүгэр кыттан, өссө үрдүк көрдөрүүлэри дабайарга санаалара көтөҕүлүннэҕэ диэн бүк эрэниэххэ сөп.

Петр ПАВЛОВ.   

Ааптар хаартыскаҕа түһэриилэрэ.    

Добавить комментарий

Ваш адрес email не будет опубликован. Обязательные поля помечены *